އައްޑޫގެ ފެނާއި ނަރުދަމާ ނިޒާމް އަޕްގްރޭޑްކުރުމުގެ މަޝްރޫއު މި ހަފްތާގައި ކޮންޓްރެކްޓަރަކާއި ހަވާލުކުރެވިގެންދާނެ ކަމަށް ރައީސް ޑރ މުހައްމަދު މުއިއްޒު ހާމަކުރައްވައިިފި އެވެ.
ރައީސް މިފަދައިން ހާމަކުރެއްވީ މިހާރު އައްޑޫ ސިޓީއަށް ކުރައްވަމުން އަންނަ ދަތުރުފުޅުގެ ތެރެއިން އައްޑޫ ރައްޔިތުންނާއި ބައްދަލުކުރެއްވުމަށް މިރޭ ބޭއްވި ޖަލްސާގައި ދެއްކެވި ވާހަކަފުޅުގައި އެވެ.
ރައީސް އިތުރަށް ވިދާޅުވީ މި މަޝްރޫއުގެ މަސައްކަތް މާދަމާ ނުވަތަ މި ފަށާ ހަފްތާގެ ތެރޭގައި ހަވާލުކުރާނެ ކަމަށާއި މި މަސައްކަތް ހަވާލު ކުރަނީ މޯލްޑިވްސް ވޯޓާރ އެންޑް ސުވަރޭޖް ކޮމްޕެނީ, އެމްޑަބްލިއުއެސްސީއާއި ކަމަށެވެ. އެގޮތުން މި މަޝްރޫއުގެ ދަށުން އައްޑޫ ސިޓީގެ ހުރިހާ ރަށެއްގެ ފެނާއި ނަރެުދަމާ އަޕްގްރޭޑް ވެގެންދާނެ ކަން ރައީސް ހާމަކުރެއްވި އެވެ. އެގޮތުން މިމަޝްރޫއަށް ގާތްގަނޑަކަށް 282 މިލިއަން ރުފިޔާ ހަރަދުވާނެ ކަން ރައީސް ހާމަކުރެއްވި އެވެ.
ގިނަ ބަޔަކާއި އެކު މިރޭ ބޭއްވި ޖަލްސާގައި ރައީސް ވަނީ އައްޑޫގެ ގިނަ މަޝްރޫއުތަކެއްގެ އަދާހަމަ އެސިޓީގެ ރައްޔިތުންނާއި ހިއްސާކުރައްވާފައި އެވެ. އެގޮތުން ރައީސް ވަނީ އެމަނިކުފުާނުގެ އައްޑޫ ސިޓީއަށް ވެވަޑައިގެންނެވި ހުރިހާ ވައުދެއްވެސް މި ދައުރުގެ ތެރޭގައި ފުރިހަމަ ކުރެއްވުމަށް މަސައްކަތް ކުރައްވާނެކަންވެސް ހާމަކުރައްވާފައި އެވެ. އަދި މި ވައުދުތައް ފުއްދުމުގައި ރައްޔިތުންގެ އެހީތެރިކަމަށްވެސް ރައީސް ވަނީ އެދިވަޑައިގެންފައެވެ.
