ވިއްސާރާގައި މާލެ ތެރެ ފެންބޮޑުވެ، ބަރު އުޅަނދުތައް ނުދުއްވަން ފުލުހުން އިލްތިމާސްކޮށްފިއެވެ.
މިއަދު ހެނދުނުން ފެށިގެން ރާއްޖޭގެ އެކި ސަރަހައްދުތަކަށް ކުރަމުން އަންނަ ބޯ ވިއްސާރާގައި މާލޭގެ މަގުތަކުގައި ފެންބޮޑުވެ، ގެތަކަށް ފެން ވަދެ ބައެއް ގެތަކުގައި ދިރިނޫޅެވޭ ހާލަތަށް ވެސް ވަނީ ގޮސްފައެވެ. އަދި ގެތަކުން ނުކުތް ސާމާނާއި، މަގުތަކުގައި ހުރި ކުނި އޮޔާ ދާތީ، ނުރައްކާތެރި ހާދިސާތަކަށް ވަނީ މަގުފަހިވެފައެވެ.
މާލެ މަގުމަތީގައި ފެން ހިންދުމުގެ މަސައްކަތް ފުލުހުންނާއި، އެމްއެންޑީއެފް އިން މިހާރު ކުރަމުން އަންނައިރު، ފުލުހުން ވަނި ފެން ހިންދާ ނިމެންދެން ބަރު އުޅަނދާއި، ހަތަރުފުރޮޅުލީ އުޅަނދުތައް މާލެ ސަރަހައްދުގައި ކޮންމެހެން ދުއްވަން ޖެހިގެން ނޫނީ ނުދުއްވަން އިލްތިމާސްކޮށްފައެވެ.
މި ވިއްސާރައާ ގުޅިގެން މުސުމާ ބެހޭ ގައުމީ އިދާރާއިން ބުނީ މިހާރު ރާއްޖެއަށް ކުރަމުންމިދަނީ އިރުވައިމޫސުމުން ހުޅަނގުމޫސުމަށް އެޅުމުން ކުރަމުންދާ ދެމޫސުންބެދޭ ވިއްސާރަ ކަމަށެވެ. މެޓް އޮފީހުން ބުނީ ޖުމުލަކޮށް ރާއްޖޭގެ ހުރިހާ ސަރަހައްދަކަށްވެސް ވިއްސާރަކުރާނެ ކަމަށެވެ. ވިއްސާރަކުރި ނަމަވެސް، ރާއްޖެ ސަރަހައްދަށް ވަޔާއި ކަނޑު މަޑު ކަމަށް މެޓުން ބުނެއެވެ.
