ކުޅުދުއްފުށީގެ ކަރަންޓުގެ މައްސަލަ ހައްލުކުރަން ސްޓެލްކޯގެ ޓީމެއް އެރަށަށް ގޮސްފިއެވެ.

ކުޅުދުއްފުށީގެ އެކި ސަރަހައްދުތަކުން ކަރަންޓު ކެނޑޭ މައްސަލަ ދިމާވަތާ މިހާރު ވަނީ މަހަކަށް ވުރެ ގިނަ ދުވަސްވެފައެވެ. އެކަން ހައްލުކުރުމަށް ފެނަކައިން މަސައްކަތްކުރަމުން އަންނައިރު، ސްޓެލްކޯއިން މިއަދު ބުނީ ކުޅުދުއްފުށި ސިޓީއަށް ދިމާވެފައިވާ ކަރަންޓުގެ މައްސަލަ ޙައްލު ކުރުމަށް ފެނަކައިގެ އެދުމުގެ މަތިން މިކުންފުނީގެ ގިނަދުވަސްވީ ތަޖުރިބާކާރު އިލެކްޓްރިކަލް އަދި މެކޭނިކަލް އިންޖީނިއަރުން ހިމެނޭ ޓީމެއް އެރަށަށް ގޮސްފައިވާ ކަމަށެވެ.އަދި ސްޓެލްކޯގެ ޓީމާއި ފެނަކައިގެ މުވައްޒަފުން ގުޅިގެން އެ މައްސަލަ ޙައްލުކޮށް ވީއެންމެ އަވަހަކަށް ކުޅުދުއްފުށި ސިޓީގެ ރައްޔިތުންނަށް ކަަރަންޓުގެ ޚިދުމަތް ޔަގީންކޮށްދެވިގެންދާނެ ކަމަށް އެ ކުންފުނިން ބުނެއެވެ.

ކުޅުދުއްފުއްޓަށް ކަރަންޓު ދިނުމަށް ހަތް ޖަނަރޭޓަރު ބޭނުންކުރެ އެވެ. ހޫނު ގަދަވުމުގެ ސަބަބުން ލޯޑް ނުހިފެހެއްޓި، އެ ރަށުގައި ހުރި ޖަނަރޭޓަރުތަކުން ރަށަށް ބޭނުންވާ ވަރަށް ކަރަންޓު ނުއުފެއްދޭތީ ކޮންމެ ދުވަހަކު ވެސް ވަކި ގަޑިތަކެއްގައި ޖެހެނީ ރަށުން ކަރަންޓު ކަނޑައެވެ. މި މައްސަލަ ހައްލުކުރުމަށް އެ ރަށަށް އިތުރު ޖަނަރޭޓަރު ވެސް ވަނީ ފޮނުވާފައެވެ. އެކަމަކު އެ މައްސަލަ ހައްލުނުވެ ދިގުލައިގެން ގޮސް މުޅި ރަށުން ކަރަންޓު ކެނޑުނީ މިއަދު ހެނދުނު 9:30 ހާއިރު. މި މައްސަލަ މިއަދު ހައްލުކޮށް، މުޅި ރަށަށް މިރޭ ކަރަންޓު ދޭނެ ކަމަށް އެ ކުންފުނިން ވަނީ ބުނެފައެވެ.