ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އިލެކްޝަންސް ކޮމިޝަނުގެ މެންބަރުކަމަށް، ޙަސަން ޒަކަރިއްޔާ، ޢައްޔަން ކުރައްވައިފިއެވެ.
އިލެކްޝަންސް ކޮމިޝަންގެ މެންބަރުކަމަށް، ޙަސަން ޒަކަރިއްޔާ، ޢައްޔަނު ކުރެއްވިކަމުގެ ލިޔުން، ޙަސަން ޒަކަރިއްޔާއާ ރައީސުލްޖުމްހޫރިއްޔާ ހަވާލުކުރެއްވީ، އެކަމަށްޓަކައި މިއަދު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތެއްގައެވެ.
މި ރަސްމިއްޔާތުގައި ލިޔުން ހަވާލު ކުރެއްވުމުގެ ކުރިން، ސުޕްރީމް ކޯޓުގެ ފަނޑިޔާރު އޮނަރަބަލް އަލްއުސްތާޛު ޢަލީ ރަޝީދު ޙުސައިންގެ ކުރިފުޅުމަތީގައި، ޙަސަން ޒަކަރިއްޔާ، އިލެކްޝަންސް ކޮމިޝަނުގެ މެންބަރުކަމުގެ ހުވައި ކުރައްވައި، ހުވައިގެ އިޤުރާރުގައި ސޮއި ކުރެއްވިއެވެ.
ހަސަން އެ މަގާމަށް އައްޔަންކުރައްވާފައި ވަނީ ކޮމިޝަނުގެ ނައިބުރައީސްގެ މަގާމުގައި ހުންނެވި އިސްމާއީލް ހަބީބްގެ މެންބަރުކަމުގެ ދައުރު ހަމަވެ، މެމްބަރެއްގެ ގޮނޑި ހުސްވުމުންނެވެ. ހަސަން މެމްބަރު ކަމަށް އައްޔަންކުރެއްވިއިރު އޭނާ ވަނީ ފާއިތުވި ތިން އަހަރު އީސީގެ އެސްޖީގެ މަގާމު އަދާކުރައްވާފައެވެ.
ހަސަން އީސީގެ މެމްބަރުކަމަށް އައްޔަންކުރަން މަޖިލީޙުން ފާސްކޮށްފައިވަނީ އޭޕްރިލް މަހުގެ އެއް ވަނަ ދުވަހުއެވެ. އީސީގައި މިހާރު ތިއްބަވަނީ ކޮމިޝަންގެ ރައީސް ފުއާދު ތައުފީގާއި ނައިބު ރައީސް އަލީ ނަޝާތާއި ޑރ. މުހައްމަދު ޒާހިރުގެ އިތުރުން މުހައްމަދު އާސިފެވެ. އީސީގެ މެންބަރު ކަމުގެ ދައުރަކީ ފަސް އަހަރެވެ.
