ސަރުކާރާއި އިދިކޮޅު ފަރާތްތަކުން ކިތަންމެ މަސައްކަތްކުރިޔަސް، ރައީސުލްޖުމްހޫރިއްޔާ ޑރ. މުހަންމަދު މުއިއްޒާއި ދެކޮޅަށް ދެއްކޭނެ އެއްވެސް ހެއްކެއް ނޯންނާނެ ކަމަށް އެމަނިކުފާނު ވިދާޅުވެއްޖެއެވެ.
ރައީސް މިހެން ވިދާޅުވީ މަޖިލިސް އިންތިހާބުގައި ޕީއެންސީ ޓިކެޓުގައި ގަލޮޅު ދެކުނު ދާއިރާއަށް ވާދަކުރައްވާ ކެންޑިޑޭޓް އިބްރާހިމް މުހައްމަދު (އިބުޓީ)ގެ ކެމްޕޭން ޖަގަހަ ހުޅުވުމަށް ރޭ ބޭއްވި ޖަލްސާގައި ވާހަކަދައްކަވަމުންނެވެ.
ރައީސް މިހެން ވިދާޅުވީ އިދިކޮޅު ފަރާތްތަކުން އެމަނިކުފާނާއި ދެކޮޅަށް އެކި ކަހަލަ ވާހަކަތައް ދައްކަމުންދާ ދަނޑިވަޅެއްގައެވެ. އެގޮތުން ހަސަން ކުރުސީ ގެ ނަމުގައި ހިންގާ ޓުވިޓަރ އެކައުންޓަކުން ވަނީ ރައީސްގެ މައްޗަށް އެކި ކަހަލަ ތުހުމަތުތައް ކޮށްފައިވާ ރިޕޯޓުތަކެއް ލީކުކޮށްލާފައެވެ. އަދި އެ ތުހުމަތުތައް ބަލަން ޖެހޭ ކަމަށް އެމްޑީޕީން ވެސް ވަނީ ގޮވާލާފައެވެ.
މިކަމާ ގުޅިގެން ރައީސް ވިދާޅުވީ މި ރިޕޯޓުތައް ލީކުކޮށްލީ އިދިކޮޅަށް ގޮތް ހުސްވެގެން ކަމަށާއި މިއީ އެމަނިކުފާނު މޭޔަރު އިންތިހާބާއި ރިޔާސީ އިންތިހާބުގައި ވާދަކުރެއްވި އިރުވެސް ދެއްކި ވާހަކަތަކެއް ކަމަށެވެ. ރައީސް ވިދާޅުވީ މިއީ މި ސަރުކާރުން ރައްޔިތުންނަށް ވެފައި ވައުދުތައް ފުއްދަވައިދެއްވާނެކަން ޔަގީންވާތީ އިދިކޮޅު ފަރާތްތަކުން ކުރާ ކަމެއް ކަމަށެވެ. އަދި އެކި ކަހަލަ ދޮގު ހަދައިގެން ވެސް އެކަން ކާމިޔާބު ނުވާ ކަމުގެ ހެއްކަކީ މިދިޔަ ފަސް މަސް ތެރޭގައި ވެސް ގިނަ ވައުދުތައް ފުއްދިފައި ހުރުން ކަމަށް ވިދާޅުވިއެވެ.
"އަޅުގަނޑަކީ އިރާދަކުރެއްވީތީ ރައްޔިތުންގެ ހައްގުގައި ޖެހޭނެ މީހެއް ނޫން. ރައްޔިތުންގެ މުދަލަކު ޖެހޭނެ މީހެއް ނޫން. ރައްޔިތުންގެ ފައިސާއަކު ޖެހޭނެ މީހެއް ނޫން. އަޅުގަނޑަށް މާ މުހިންމު ﷲ ސުބުހާނަހޫވަތައާލާ ކިބައިނަ އަޅުގަނޑަށް އެކަލާނގެ ރުއްސެވުމާއި ފުއްސެވުން ލިބުން. އެހެންވީމަ ތިބޭފުޅުން އަދި ތިގޮތަށް އަޅުގަނޑުގެ ބޮލުގައި ކަމެއް އަޅުވަން އުޅެ. ކުރީގަ ވެސް ނުވި ކަމެއް ދެނެއް ވެސް ނުވާނެ. އުޑުގަ ޖެހިފަ ބިމުގަ ޖެހުނަސް އަޅުގަނޑާ ދެކޮޅަށް ދެއްކޭނެ އެއްވެސް ކަމެއް ނޯންނާނެ." ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނާއި ދެކޮޅަށް އެފަދަ ކިތަންމެ ވާހަކައެއް ދެއްކި ނަމަވެސް، އެކަން ސާބިތުނުވާނެ ކަމަށެވެ. އަދި ރައްޔިތުން އެވާހަކަތައް ގަބޫލުވެސް ނުކުރާނެ ކަމަށާއި، އެ ދައްކާ ވާހަކަތަކަކީ ކަނޑައެޅިގެން ދޮގު އަދި ސާބިތު ނުހިފޭ ވާހަކަތަކެއް ކަމުގެ ޔަގީންކަން އެމަނިކުފާނު ދެއްވާކަމަށެވެ.
"އަޅުގަނޑު ކިބައިން ނުފެންނާނެ އެއްވެސް ކަމެއް. އަޅުގަނޑަކީ އެކަހަލަ، އެ ބޭފުޅުން އެ ވިޝް ކުރާ ކަހަލަ ކަމެއް ކޮށްފަ ހުރި މީހެއް ނޫން. ދުވަހަކު ވެސް ނުކުރާނަން ރައްޔިތުންނަށް ދެރައެއް ލިބޭނެ ގަވާއިދާ ޚިލާފު އަދި ގާނޫނާ ޚިލާފު އެއްވެސް ކަމެއް. ދުވަހަކު ވެސް ނުކުރާނަން ކޮށްފައެއް ވެސް ނޯންނާނެ. އަޅުގަނޑު އެދެނީ ހަމަ ގަދައަށް ތިވާހަކަ ދައްކަން. ދެއްކި ވަރަކަށް ތިބޭފުޅުން ބޭޒާރުވާނީ." ރައީސް ވިދާޅުވިއެވެ.
ރައީސްގެ މައްޗަށް ތުހުމަތުތަކެއް ކޮށް އާންމުކޮށްފައިވާ ރިޕޯޓުގައި ފުލުހުންނާއި އެމްއެމްއޭގެ ފައިނޭޝަނަލް އިންޓަލިޖެންސް (ފައިޔޫ)ގެ އިންޓެލިޖެންސް ރިޕޯޓެއް ކަމަށް ބުނާ ލިޔުންތަކެއް ހިމެނޭ. އެ ލިޔުންތަކުން ފެންނަންހުރީ ކޮރަޕްޝަނަށް މަގުފަހިވާ ގޮތަށް ހިންގާފައިވާ މުއާމަލާތްތަކެއް ކަމަށް ތުހުމަތުކޮށްފައިވެއެވެ. އަދި މަނީ ލޯންޑަރިން އާއި ހިޔާނާތުގެ ތުހުމަތު ވެސް ކޮށްފައިވެއެވެ. އޭގެ ތެރޭގައި އެމަނިކުފާނުގެ ރޯހައުސްގައި ދިރިއުޅުނު މީހުންގެ ކުއްޔާއި ބައްޕާފުޅުގެ ފަރާތުން ވާރުތަވީ މުދަލާގުޅޭ މައުލޫމާތުގައި ހިމަނާފައިވެއެވެ. އެކަމަކު އެ ރިޕޯޓުތަކަކީ ތާރީހެއް ތައްގަނޑެއް ނުޖަހައި އޮތް ޕޮލިސް އިންޓެލިޖެންސް ރިޕޯޓުގެ ޑްރާފްޓެކެވެ.
