އިސްލާމީ ފަތުވާ ދޭ އެންމެ މަތީ މަޖިލީހަށް ރައީސް މުހައްމަދު މުއިއްޒު ދެ މެންބަރުން އައްޔަނު ކުރައްވައިފި އެވެ.
ފަތުވާ މަޖިލީހަކީ ދީނީ އެއްބައިވަންތަކަން ހިމާޔަތް ކުރުމުގެ ގާނޫނުގެ ދަށުން ފިގުހީ އެކި ކަންކަމުގައި ދީނީ ގޮތުން ރައުޔުތައް ދިނުމަށް އުފައްދާފައިވާ މަޖިލީހެކެވެ. އެ މަޖިލީހުގައި 5 މެންބަރުން ތިއްބަވައެވެ.
އެ މަޖިލީހަށް ރައީސުލްޖުމްހޫރިއްޔާ އައްޔަންކުރެއްވީ ޑރ. މޫސާ އަންވަރު ހަސަން އަދި ޑރ. އަލީ ޒާހިރު އެވެ. މި ދެ ބޭފުޅުންގެ ތެރެއިން ޑރ. މޫސާ އަންވަރު ހަސަން އައްޔަންކުރައްވާފައި ވަނީ އިސްލާމިކް މިނިސްޓްރީގެ ލަފާގެ މަތިންނެވެ. އަދި ޑރ. އަލީ ޒާހިރު އައްޔަންކުރައްވާފައި ވަނީ ގައުމީ ޔުނިވަރސިޓީ ނުވަތަ ޔުނިވާސިޓީގެ އެކެޑެމިކް މުވައްޒަފުންގެ ތެރެއިން އައްޔަނު ކުރަންޖެހޭ މެންބަރުގެ ގޮތުގައެވެ.
އިސްލާމިކް މިނިސްޓްރީ އިން ބުނީ، މި ދެބޭފުޅުން ފަތުވާ މަޖިލީހަށް އައްޔަނު ކުރެއްވީ މިދިޔަ މަހުގެ 18 ގައި ކަމަށެވެ. މި ދެ މެމްބަރުންނާއި އެކު ފަތުވާ މަޖިލީހުގައި މިހާރު ތިއްބަވަނީ ޑރ. މުހައްމަދު ރަޝީދު އިބްރާހިމް، ޑރ. އަބްދުއްސައްތާރު އަބްދުއްރަހުމާން، ޑރ. މޫސާ އަންވަރު ހަސަން، އަދި ޑރ. އަލީ ޒާހިރު އާއި، އިލްޔާސް ހުސެންނެވެ.
