ވެމްކޯގެ ޙިދުމަތް ރަސްމީކޮށް ކުޅުދުއްފުށީ ސިޓީގައި ފެށުމަށް ވެމްކޯއިން ތައްޔާރުވެއްޖެކަމަށް އެކުންފުނިން ބުނެފިއެވެ.

އެ ކުންފުނިން މައުލޫމާތުދޭގޮތުގައި މި މަހު 25 ވަނަ ދުވަހުގެ ކުރިން އެރަށުގެ ގެތަކުން ކުނި ނެގުމުގެ ޙިދުމަތް ރަސްމީކޮށް ފެށިގެންދާނެއެވެ.

މިވަގުތު އެކުންފުނީގެ ފަރާތުން ކުރަމުންދަނީ ޙިދުމަތް ފެށުމަށް ކުރަންޖެހޭ އެންމެ ފަހުގެ ތައްޔާރީތައްކަމަށް ވެސް އެކުންފުނިން ބުނެއެވެ. އެގޮތުން މިވަގުތު ކުރިއަށްދަނީ އެރަށު ކުނި ގޮނޑު ހުސްކުރުމުގެ މަސައްކަތް ވެމްކޯއިން ބުނެއެވެ.

ކުޅުދުއްފުށީގެ އިތުރަށް އެކުންފުނިން އަންނަނީ އިތުރު 2 ރަށެއްގައި ޙިދުމަތް ދިނުމަށް ތައްޔާރުވަމުންނެވެ. މިގޮތުން ތިނަދޫ ސިޓީ އަދި ކ މާފުށީގައި މި މަސްތެރޭ ހިދުމަތް ދިނުމަށް ތައްޔާރުވަމުންދާކަމަށް އެކުންފުނިން ބުނެއެވެ.

މިޔާއެކު މުޅި ރާއްޖެއަށް އެކުންފުނީގެ ޙިދުމަތް ފުޅާކުރުމަށް ކުރަމުން އަންނަ މަސައްކަތަށް މިވަނީ އިތުރު ކުރިއެރުމެއް ލިބިފައެވެ. ޑރ މުއިޒްގެ ސަރުކާރާއެކު ވެމްކޯއަށް އައްޔަންކުރެވުނު އައު މެނޭޖިންގ ޑިރެކްޓަރ މުޖްތަބާ ޖަލީލް ވަނީ އެކުންފުނީގެ ޙިދުމަތް އިތުރަށް ހަރުދަނާ ކުރުމަށް ގިނަ މަސައްކަތްތަކެއް ކުރަމުން އަންނަ ކަމަށް މީގެ ކުރިން ބުނެފައެވެ.