ބަންގްލަދޭޝްގެ ބޮޑުވަޒީރު ޝެއިޙް ހަސީނާ މަގާމުން އިސްތިއުފާ ދެއްވައިފިއެވެ.
ބަންގްލަދޭޝް ސަރުކާރުގެ ވަޒީފާތަކަށް ކޯޓާ ގެނައުމުގެ ނިޒާމު ނިމުމަކަށް ގެނައުމަށް ގޮވާލައި މިދިޔަ ޖުލައި މަހު ދަރިވަރުން ފެށި މުޒާހަރާތައް މިހާރު ވަނީ މާ ބޮޑަަަށް ހޫނުވެފައެވެ. މިގޮތުން ޖޫން މަހުން ފެށިގެން މިހާތަނަށް އައިއިރު މި ހަމަނުޖެހުމުގައި 300 އަށް ވުރެ ގިނަ މީހުން މަރުވެފައިވާއިރު އިއްޔެ އެކަނިވެސް 14 ފުލުހުން ހިމެނޭހެން 99 މީހުން ވަނީ މަރުވެފައެވެ.
މިނިވަން ހަނގުރާމަވެރިންގެ ދަރިކޮޅުގެ މީހުންނަށް ސަރުކާރުގެ ވަޒީފާތަކުގެ 30 ޕަސެންޓް ކޯޓާ އަލުން ދިނުމަށް ބަންގްލަދޭޝްގެ ހައިކޯޓުން ނިންމި ނިންމުމާއި ގުޅިގެން ޖުލައި މަހުން ފެށިގެން ދިޔަ މި ހަމަނުޖެހުންތައް އިތުރަށް ފުޅާވެ އެ ގައުމުގެ ހާލަތު ގޯހުން ގޯހަށް ގޮސްފައެވެ.
ބަންގްލަދޭޝްގައި މިވަގުތު އިންޓަނެޓް ވަނީ ކަނޑާލާފައެވެ. އަދި ކާފިއު ހިނަގަމުންދާއިރު ސިފައިން ތިބީ ތައްޔާރީ ހާލަތުގައެވެ.
