ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން އިމާރާތް ތަޅައިދިނުން ނުވަތަ ޑިމޮލިޝިންގެ ހިދުމަތް ދޭން ނިންމަވާފައިވާ ކަމަށް އެ ކުންފުނިން ބުނެފި އެވެ.
ރާއްޖޭގެ އެކި ކަންކޮޅުތަކުގައި ތަފާތު އެކި ހިދުމަތްތައް ދޭން ފަށާފައިވާ ވެމްކޯ ވުޖޫދަށް އައީ 2017 ވަނަ އަހަރުގައެވެ. އައު ސަރުކާރާއި އެކު އެންމެ ހިންގުންތެރި އަދި ހިދުމަތްތައް ފުޅާކުރުމުގެ މަސައްކަތް އެންމެ ބޮޑަށް ކުރަމުންދާ ކުންފުންޏަކީ ވެމްކޯއެވެ. އެގޮތުން މިއަހަރުގެ ތެރޭގައި އެކަނިވެސް ވެމްކޯއިން ވަނީ އެކުންފުނީގެ ވޭސްޓް ކަލެކްޝަންގެ ހިދުމަތް އިތުރު ރަށްތަކަކަށް ފުޅާކޮށް ރިސޯޓު ވޭސްޓް ކަލެކްޝަން އާއި ފޮޅާ ސާފު ކުރުމަށް "ހޮބާ" ގެ ނަމުގައި ހިދުމަތްތަކެއް ތައާރަފްކޮށްފައެވެ.
ވެމްކޯގެ މީޑިއާ އޮފިޝަލަކު "ތިލަކޮން" އަށް ވިދާޅުވީ ޑިމޮލިޝިންގެ ހިދުމަތް އަންނަ އަހަރުގެ ކުރީކޮޅު ދޭން ފެށުމަށް މަސައްކަތް ކުރަމުން އަންނަ ކަމަށެވެ. އޮފިޝަލް އިތުރަށް ވިދާޅުވީ މިހާރު ކުރަމުންދަނީ އެމަަސައްކަތް ފެށުމަށް ވާންޖެހޭ އިދާރީ ބައެއް މަސައްކަތްތައް ކަމަށާއި އެކަމަށް އަގު ކަނޑައެޅުންވެސް އެމަސައްކަތްތަކުގެ ތެރޭގައި ހިމެނޭ ކަމަށެވެ. އަދި އިދާރީ މަސައްކަތްތައް ނިމުނުހާ އަވަހަކަށް އަގުތައް އާންމުކުރާނެކަންވެސް ވަނީ ހާމަކޮށްފައެވެ.
