ގައުމީ އެއާލައިން މޯލްޑިވިއަން އިން 'ތުރޫފެއާ' ތައާރަފުކޮށް، އެ އެއާލައިނުން އުދުހޭ ބައިނަލްއަގުވާމީ ތިން މަންޒިލަކާ، ރާއްޖޭގައި އުދުހޭ 16 މަންޒިލް ގުޅުވާލައިފި އެވެ.
ތުރޫފެއާ މެދުވެރިކޮށް މޯލްޑިވިއަން އިން ބަންގްލަދޭޝްގެ ޑާކާ، އިންޑިއާގެ ބެންގަލޫރު އަދި ސްރީ ލަންކާގެ ކޮލަމްބޯއަށް ކުރާ ދަތުރުގެ ބުކިންގެ ތެރޭގައި ރާއްޖޭގެ އެތެރޭގެ މަންޒިލުތަކުގެ ތެރެއިން މޯލްޑިވިއަން އިން ދަތުުރުކުރާ ކޮންމެ މަންޒިލަކަށް ވެސް ޓިކެޓު ބުކިން ހެދޭނެ އެވެ.
މޯލްޑިވިއަންއިން ބުނީ ތުރޫފެއާ ބުކިން ހައްދާ ކަސްޓަމަރުންނަށް %5އާ ހަމައަށް ޑިސްކައުންޓު ލިބޭނެ ކަމަށާއި އިންޓަނޭޝަނަލް ދަތުރުގައި ލިބޭ މިންވަރަށް ޑޮމެސްޓިކް ދަތުރަށް ވެސް ބެގޭޖު އެލަވެންސް ލިބޭނެ ކަމަށެވެ.
ކުރިއަށް އޮތް ތަނުގައި ޓްރެވިންޑްރަމް އާއި ކޮޗިން ދަތުރުތަކަށް ވެސް ތުރޫފެއާ ތައާރަފު ކުރާނެ ކަމަށް އެ އެއާލައިނުން ބުންޏެވެ.
މޯލްޑިވިއަން އިން ބުނީ އެ އެއާލައިނުގެ އެޕްލިކޭޝަން، ވެބްސައިޓު އަދި ސޭލްސް އެޖެންޓުންނާއި ޓިކެޓިން އޮފީހުން ވެސް ތުރޫފެއާ ބުކް ކުރެވޭނެ ކަމަށެވެ.
