ކުރިޔަށް އޮތް ރައްޔިތުންގެ މަޖިލީހުގެ އިންތިހާބުގައި ވާދަ ކުރާ ކެންޑިޑޭޓުންގެ އިންތިހާބީ ހައްގުތަކަށް އުނިކަން އަންނަ ގޮތަށް ކެމްޕެއިން ކުރާނަމަ ފިޔަވަޅު އަޅާނެ ކަމަށް އިލެކްޝަންސް ކޮމިޝަން (އީސީ)ން ބުނެފިއެވެ.

ރައްޔިތުންގެ މަޖިލިސް އިންތިޚާބު މި މަހުގެ 21 ވަނަ ދުވަހު ބާއްވަން ތާވަލްކޮށްފައިވާއިރު، ކެންޑިޑޭޓުންނަށް ކެމްޕޭންގެ ފުރުސަތު ހުޅުވާލީ މިދިޔަ ފެބްރުއަރީގައެވެ. އަދި ކެމްޕޭންގެ ފުރުސަތު ބަންދުވަނީ މި މަހުގެ 20 ވަނަ ދުވަހުގެ އިރު އޮއްސި 6 އާ ހަމައަށެވެ.

ކެމްޕޭނާއި ގުޅިގެން އެ ކޮމިޝަނުން މިއަދު ނެރުނު ބަޔާނުގައި ބުނީ މަޖިލިސް އިންތިހާބުގައި ކެންޑިޑޭޓުންނަށް ތާއީދު ހޯދަން ކުރާ މަސައްކަތުގައި އެންޓި ކެމްޕެއިންގެ އަމަލުތައް ފެންނަމުންދާ ކަމަށެވެ. އަދި ތާއީދު ހޯދުމަށް ބޭނުން ކުރާ ޕޯސްޓަރުތަކާއި ބެނާތަކުގައި ވެސް ކެންޑިޑޭޓެއްގެ އިންތިހާބީ ހައްގަށް އުނިކަން ލިބޭފަދަ މެސެޖުތައް ދައުރު ކުރަމުންދާ ކަމަށް ކޮމިޝަނުން ބުނެފައިވެއެވެ.

އެ ކޮމިޝަނުން ބުނީ ކެންޑިޑޭޓުންގެ އިންތިހާބީ ހައްގަށް އުނިކަން އަތުވެދާނެ ފަދަ އެއްވެސް ކަމެއް ކުރުމާއި ކެންޑިޑޭޓަކާ ބެހޭ ގޮތުން ދޮގު މައުލޫމާތު ފެތުރުމަކީ އިންތިހާބުތަކާ ބެހޭ އާންމު ގާނޫނުން މަނާ ކަމެއް ކަމަށެވެ. އަދި އެފަދަ މައްސަލަތަކަކީ ހިއުމަން ރައިޓްސް ކޮމިޝަން، އަދި އީސީ އަށް ވެސް ހުށަހަޅައިގެން ބަލާ ފިޔަވަޅު އެޅޭނެ މައްސަލަތަކަށް ވާއިރު، އެކަމުގައި އޮންނަ ސުލޫކީ މިންގަނޑަށް ތަބާވުމަށް ވެސް އެ ކޮމިޝަނުން އިލްތިމާސްކޮށްފައިވެއެވެ.

ރައްޔިތުންގެ މަޖިލިސް އިންތިޚާބަށް ވާދަކުރައްވާ ކެންޑިޑޭޓުންގެ ބެނާތަކާއި ޕޯސްޓަރުތައް ހަރުކޮށްފައި ހުރި އިރު، އެ ތަކެއްޗަށް ވެސް މާލެ ސަރަހައްދާއި ބައެއް އަތޮޅުތަކުގައި ވަނީ ގެއްލުންދީފައެވެ. އެގޮތުން ބައެއް ކެންޑިޑޭޓުންގެ މޫނު ވަކިން ކަނޑާ، ޕޯސްޓަރުތަކަށް ސްޕްރޭކޮށް އެކި ގޮތްތައް ހަދާފައިވެއެވެ. ބައެއް ކެންޑިޑޭޓުންގެ ފަރާތުން މި މައްސަލަތައް ވަނީ ފުލުހަށް ވެސް ހުށަހަޅާފައެވެ.