ހޯމް މިނިސްޓަރު އަލީ އިހުސާން އަދި ފުލުހުންގެ އިސްވެރިންތަކެއް ކްރިމިނަލް ކޯޓުގެ ހުރުމަތް ކެނޑި ކަމަށް ބުނާ މައްސަލައެއް ކްރިމިނަލް ކޯޓުގެ ގާޒީންގެ ކުއްލި މަޖިލީހުން ބަލަންފަށައިފިއެވެ.

މައްސަލައާ މެދު ގޮތެއް ނިންމުމަށް، އަންނަ އާދިއްތަ ދުވަހުގެ 1 ޖަހާއިރަށް ކްރިމިނަލް ކޯޓުގެ ގާޒީންގެ ކުއްލި މަޖިލީހެއް މިހާރު ވަނީ ތާވަލުކޮށްފައެވެ.

މި މައްސަލަ ބަލަން ފަށާފައި ވަނީ ރާއްޖެ އެތެރެކުރި 119 ކިލޯގެ ޑްރަގް މައްސަލައިގައި ފުލުހުން ބޭއްވި ނޫސްވެރިންގެ ބައްދަލުވުމާއި ގުޅިގެންނެވެ. އެ މައްސަލައިގައި ދައުވާލިބުނު ބައެއް މީހުންގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ހުކުމް ކުރުމުން، ހޯމް މިނިސްޓަރުގެ އިރުޝާދުގެ ދަށުން ފުލުހުން ދާދިފަހުން ވަނީ ނޫސްވެރިންގެ ބައްދަލުވުމެއް ބޭއްވުމަށް ފަހު، އެ މައްސަލާގައި ލިބިފައިވާ ހެކިތައް ހާމަކޮށްފައެވެ.

މި މައްސަލާގައި ފަނޑިޔާރުންނަށް ނުފޫޒުފޯރުވައި، ހުރުމަތް ކެނޑިކަމުގެ ތުހުމަތުކޮށްފައިވަނީ އިހުސާނުގެ އިތުރުން ފުލުހުންގެ ޗީފް ސުޕްރިޓެންޑެންޓް އަހުމަދު ޝާކިރަށް، ޗީފް އިންސްޕެކްޓަރު އަހްމަދު ވަހީދު އަދި ސަބްއިންސްޕެކްޓަރު މަމްދޫހު ހަސަންގެ މައްޗަށެވެ. އެއީ މިނިސްޓަރ އިހުސާނާއި އެކު ނޫސްވެރިންގެ ބައްދަލުވުމުގައި ބައިވެރިވެވަޑައިގެންނެވި އޮފިސަރުންނެވެ. އެ ބައްދަލުވުމުގައި ފުލުހުން ވަނީ ވަރަށް ތަފްސީލްކޮށް، އެ މައްސަލާގެ ހެކިތައް ހުށަހަޅާފައެވެ. އޭގެ ތެރޭގައި ސީސީޓީވީ ފޫޓޭޖްތައް ބޭނުންކޮށްގެން، އެކަން ހިންގާފައިވާ ގޮތުގައި ތަފްސީލް ވީޑިއޯއެއް ވަނީ ހުށަހަޅާފައެވެ.